அமெரிக்காவின் ஜார்ஜியா மாநிலத்தில் உள்ள கம்மிங் நகரில் 'தமிழ் எழுதப்படி' பதிப்பகத்தால் ஏற்பாடு செய்யப்பட்ட கின்னஸ் வேர்ல்ட் ரெகார்டஸ் (Guinness World Records) உலக சாதனை ஒன்று டிசம்பர் 7 2024 சனிக்கிழமை அன்று நிகழ்த்தப்பட்டது. 124 எழுத்தாளர்கள் தொடர்ந்து தாம் எழுதிய புத்தகங்களிலிருந்து வாசித்தனர். இது கிட்டத்தட்ட 12 மணி நேரம் விடாமல் நடந்து முடிந்தது.
இந்தச் சாதனையைப் படைத்த 'தமிழ் எழுதப்படி' பதிப்பகம், தமிழ் மொழி மற்றும் கலாச்சாரத்தைக் கற்பிக்கும் வட அமெரிக்காவைச் சேர்ந்த 4 பள்ளிகளுடன் இணைந்து இந்தச் சாதனையை நிகழ்த்தியுள்ளது. குழந்தைகளுக்குப் படிக்கக் கற்றுக்கொடுக்க மிகக் குறைவாகவே தமிழ்ப் புத்தகங்கள் இருப்பதைக் கவனித்து, அந்த இடைவெளியை நிரப்ப 2020 ஆம் ஆண்டு ஒரு பதிப்பக நிறுவனம் தொடங்கப்பட்டது. இதன் மூலம் பல புதிய எழுத்தாளர்கள் உருவாகினர். 2024ஆம் ஆண்டு Storybuzz.org என்ற இணைய தளத்தை ஆரம்பித்து இந்த எழுத்தாளர்களின் புத்தகங்களை இலவசமாகப் பதிவேற்றம் செய்தனர். இந்த உலக சாதனை மூலம் இந்த இளம் எழுத்தாளர்களின் புத்தகங்கள் வெளிச்சத்துக்குக் கொண்டுவரப்பட்டன.
இந்தச் சாதனை நிகழ்வில் கம்மிங் தமிழ்ப் பள்ளி, பிரெடரிக் தமிழ்ப் பள்ளி, பீச் ட்ரீ தமிழ்ப் பள்ளி, ஜேடிஎம் தமிழ் பள்ளி ஆகியவை பங்கேற்றன. நிகழ்ச்சி துல்லியமாக டிசம்பர் 7, 2024 அன்று காலை 7:48 மணிக்கு The Vine Community Church வளாகத்தில் தொடங்கியது. கடைசி மாணவர் மாலை 7:57 மணிக்கு வாசித்து முடித்தார். 12 மணி நேரம் 9 நிமிடங்களில் 124 மாணவர்கள் பங்கேற்று, 122 மாணவர்கள் ஐந்து நிமிடங்கள் தொடர்ந்து படிக்கவேண்டும் என்று இலக்கை வெற்றிகரமாகச் செய்து முடித்தனர்.
பின்னர் நடந்த விருது வழங்கும் விழாவில் கின்னஸ் நடுவர், 'தமது நூல்களை எழுதிய நூலாசிரியர்கள் அவற்றைத் தாமே அடுத்தடுத்து அதிகம் வாசிப்பதான' (Most Authors Reading consecutively from their book) இந்த வரலாற்றுச் சாதனையை அறிவித்தார். சுமார் 450 பேர் விருது வழங்கும் விழாவில் கலந்து கொண்டனர். 4 பள்ளி தலைமை ஆசிரியர்களும் , எழுத்தாளர்களும் கின்னஸ் நிறுவனம் வழங்கும் பங்கேற்புச் சான்றிதழ்களைப் பெற்றனர்.
இதனைச் சாதிக்கக் கடினமாக உழைத்த ஒவ்வொரு எழுத்தாளரும் பாராட்டுக்குரியவர். இதை வெற்றிகரமாக நடத்திக் காட்டிய 'தமிழ் எழுதப்படி' பதிப்பகக் குழுவினர், அயலகத்திலும் முயன்றால் முடியாதது எதுவுமில்லை என்பதைத் தமிழ்கூறும் நல் உலகிற்கு எடுத்துக் காட்டியுள்ளனர்.
நூல்களை வாசிக்கவும், நீங்களே எழுதவும்: Storybuzz.org
தகவல்: தீபா அகிலன்,
அட்லாண்டா, ஜார்ஜியா |